اسلام آباد۔4اکتوبر(اے پی پی)وزارت داخلہ اسلام آباد اچ فوج لاوݨ دا نوٹیفکیشن جاری کرݙتے جیندے مطابق اسلام آباد اچ 5 اکتوبر توں 17 اکتوبر تئیں سکیورٹی دے فرائض فوج انجام ݙیسی۔ ایس سی او کانفرنس ویلھے سکیورٹی سانڳے اسلام آباد اچ فوج دیاں خدمات ڳھدیاں ڳن اتے فوج دی تعیناتی آرٹیکل 245 سانڳے کیتی گئی اے۔ ݙسایا ڳئے جو فوج دے نال نال اسلام آباد اچ 5 توں 17 اکتوبر تئیں پولیس سودھا ٻئے ادارے وی فوج دا ہتھ ونݙیسن۔ شنگھائی تعاون تنظیم دا سربراہی اجلاس 15 اتے 16 اکتوبر کوں اسلام آباد اچ تھیوݨے جیندے اچ بھارت سودھا کئی ملکاں دے سربراہان اتے نمائندے شریک تھیسن۔
