اسلام آباد۔6جولائی(اے پی پی) وزیراعظم عمران خان آکھیے جو عالمی و علاقائی سطح تے اوکھے اتے ٻہوں بدلدے دور اچ پاک چین سدا بہار تزویراتی معاون شراکت داری امن، ترقی اتے خوشحالی کیتے تکڑی بنیاد اے، ساکوں امن و ترقی، آپݨے عوام دی بھہلائی اتے پوری انسانیت کیتے مشترکہ مستقبل جھیں باوقار مقاصد کوں اڳو تے ودھاوݨ کیتے رل تے کم کرݨا ہوسی، میں اشرافیہ دے تسلط، بدعنوانی اتے اقربا پروری دا شیطانی چکر تروڑݨ کیتے احتساب، شفافیت، میرٹ دی بالادستی اتے اسلامی فلاح وبہبود دے اصولوں تے پی ٹی آئی ٻݨائی اے۔ اے ڳالھ انہاں کمیونسٹ پارٹی آف چائنا (سی پی سی) دی 100 ویں سالگرہ دے موقع تے سی پی سی اتے سیاسی جماعتاں دے سربراہی اجلاس نال ورچوئل خطاب اچ آکھی۔ اجلاس نال چینی صدر شی جن پنگ وی خطاب کیتے۔ اجلاس اچ ڄڳ دے مختلف حصیاں توں 500 توں ودھ سیاسی جماعتاں اتے تقریباً 10 ہزار سیاسی کارکناں اتے نمائندیاں شرکت کیتی۔ وزیراعظم آکھیا جو اے اجلاس عوام دی خوشحالی سانڳے سیاسی جماعتاں دے کردار کوں اڳونہا کریسی، انہاں کیمونسٹ پارٹی آف چائنا دے چین اچ تبدیلی اتے سماجی ومعاشی انقلاب دے اصولاں اتے کامیابیاں دی تعریف کیتی جو عوام دی خدمت، نوآبادیاتی تسلط مکاوݨ، ترقی دے فلسفے نال ہی خوشحالی ممکن تھئی اے، پاکستان وی چین دے ہمہ پہلو قومی ترقی، تخفیف غربت، انسداد بدعنوانی اتے قومی تعمیر دے فلسفے توں فیدہ چاوݨ چاہندے، سیاسی طاقت دا بنیادی مقصد عوام دا جیوݨ بدلݨ اتے انہاں کوں آپݨی قسمت آپ بدلݨ دے قابل ٻݨاوݨ ہووݨا چاہیدے۔ انہاں چین دے صدر دے وژن ”بیلٹ اینڈ روڈ انیشیٹیو” دی وی تعریف کیتی اتے آکھیا جیویں چین کرونا نال قابو پاتے اتے فوری ویکیسن ڳھن آئے اے انسانیت دے وݙی خدمت اے۔ انہاں آکھیا جو سی پی سی دا چینی قوم کوں عظیم توں عظیم تر ٻݨاوݨ دا مشن اتے پی ٹی آئی دا ”نیا پاکستان” وژن ݙوہاں ملکاں دے عوام دے امنگاں دا آئینہ دار ہین، سماجی تحفظ، صحت و تعلیم دے اقدامات اتے گرین کلین پاکستان اتے بلین ٹری سونامی اہم منصوبے ہین۔ وزیر اعظم آکھیا جو آندا سال ساݙی تکڑی سنڳت کوں ٻیا نیڑے ڳھن آسی، اساں امن و ترقی، آپݨے عوام دء بھلائی، پوری انسانیت کیتے مشترکہ مستقبل دی برادری ٻݨاوݨ سانڳے رل مل تے کم کریندے راہسوں۔
