اسلام آباد۔31جنوری(اے پی پی):صدر مملکت ڈاکٹر عارف علوی پاکستان تے سری لنکا وچال عوامی اتے ثقافتی رابطے مزید ودھاوݨ دی لوڑھ تے زور ݙیندے ہوئیں آکھیے سری لنکا نال ݙو پاسے تجارتی حجم کوں ایندی بھرپور صلاحیت تئیں ودھاوݨا ہوسی ۔ اے ڳالھ انہاں سری لنکا کیتے نامزد پاکستانی ہائی کمشنرمیجر جنرل (ر) فہیم العزیز نال ڳالھ مہاڑ کریندے ہوئیں آکھی اے جنھاں ٻدھ کوں اتھاں ایوان صدر اچ انہاں دے نال ملاقات کیتی ۔ صدر مملکت ڈاکٹر عارف علوی آکھیے پاکستان سری لنکا نال ݙو پاسے تعلقات کوں خصوصی اہمیت ݙیندے ، ݙوہیں وچال 7 ݙھاکیں تے محیط تکڑے تعلقات ہن ،پاکستان تے سری لنکا وچال عوامی اتے ثقافتی رابطے مزید ودھاوݨ دی لوڑھ اے ، سری لنکا نال معاشی ، تعلیمی اتے ثقافتی رابطے مزید تکڑے بݨاوݨے ہوسن ۔ صدر مملکت آکھیے ݙوہیں ملک ھک ݙوجھے بارے خیرسگالی جذبات کوں تکڑے اقتصادی رابطے اچ بدلݨا ہوسی ۔ انہاں پاکستان اچ بدھ مت ورثہ دیاں جہیں دی سیاحتی اہمیت کوں اجاگر کیتے۔ صدر مملکت میجر جنرل (ر) فہیم العزیز کوں سری لنکا اچ پاکستان دا ہائی کمشنر نامزد تھیوݨ تے مبارخ ݙتی ۔
