لاہور۔13مئی (اے پی پی) وزیرِ اعظم محمد شہباز شریف دا اڄوکے سال کݨک دی بھرپور فصل تے اطمینان کریندے ہوئیں آکھیے جو کݨک دی بھرپور فصل دا فیدہ کساناں تئیں پڄاوݨ کیتے عملی اقدامات کرݨے ہوسن ، وزیراعظم خیبر پختونخوا اچ کݨک تے اٹے دیاں قیمتاں ودھارے دا سخت نوٹس گھندے ہوئیں متعلقہ حکام کوں خیبرپختونخوا اچ اٹے تے کݨک دی قیمت کنٹرول کرݨ سانڳے اقدامات دی ہدایت کیتی ۔ وزیراعظم اے ہدایات پنجاب اتے خیبر پختونخوا اچ کݨک مل گھنݨ تے رسد و طلب دے حوالے نال اہم جائزہ اجلاس دی صدارت کریندے ہوئیں آکھی ۔ اجلاس ہفتہ کوں لاہور اچ تھیا ۔ اجلاس کوں ݙسایا ڳیا جو پنجاب توں خیبر پختونخوا کوں 10 کلو دے ترائے لکھ اٹے دے تھیلے روزانہ ݙتے ویندے پئن جیں تے وزیرِ اعظم متعلقہ حکام کوں پنجاب توں خیبر پختونخوا کوں اٹے دی فراہمی ودھاوݨ دی ہدایت کیتی ۔ وزیرِ اعظم ایں حوالے نال پنجاب تے خیبر پختونخوا دے چیف سیکرٹریز کوں مل تے لائحہ عمل تیار کرݨ دی وی ہدایت کیتی ۔وزیرِ اعظم آکھیے کݨک دی ذخیرہ اندوزی تے اسمگلنگ کہیں صورت برداشت نہ کیتی ویسی ۔ انہاں ہدایت کیتی جو کݨک غیر قانونی ذخیرہ کرݨ آلیں دے خلاف سخت کاروائی کیتی ونڄے تاں جو عام عوام تئیں اٹا تے کہیں رکاوٹ دے بغیر پڄے۔اجلاس کوں ݙسایا ڳئے جو پنجاب کݨک دی خریداری دے حوالے نال ہدف وختی پورا کر گھنسی۔ چیف سیکرٹری خیبر پختونخوا اجلاس کوں ݙسایا جو خیبر پختونخوا کوں پاسکو دی طرفوں 80 ہزار ٹن کݨک دی ترسیل دا کم جاری اے۔ اجلاس اچ وفاقی وزیر پارلیمانی امور مرتضی جاوید عباسی ، مشیر وزیرِ اعظم انجنیئر امیر مقام ، نگران وزیر اعلی پنجاب سید محسن رضا نقوی ،وفاقی سیکرٹری قومی غذائی تحفظ و تحقیق ,چیف سیکرٹریز پنجاب ، خیبر پختونخوا تے ٻئے متعلقہ افسران شرکت کیتی۔
.jpg)
