اسلام آباد۔20دسمبر (اے پی پی) وفاقی وزیر مواصلات عبدالعلیم خان دی این ایچ اے کوں ساری موٹرویز اتے جی ٹی روڈ کیتے سیفٹی اینڈ سکیورٹی پلان ٻݨاوݨ دی ہدایت کیتی اے۔ جمعے کوں جاری بیان موجب اے ہدایت انہاں آپݨی صدارت اچ تھیوݨ آلے اجلاس اچ آکھی۔ وفاقی وزیر آکھیا جو حادثیاں اچ ریسکیو کیتے چاریں صوبیاں اچ ہیلی کاپٹر سروس اتے فوری ریلیف ملݨا چاہیدے۔ شہریاں دی جان بچاوݨ پہلی ترجیح اے۔ وفاقی وزیر مواصلات ہدایت کیتی جو نیشنل ہائی وے اتھارٹی (این ایچ اے) کراچی توں پشاور تئیں اتے بلوچستان کیتے ایمرجنسی سروسز سینٹرز دی نشاندہی کریسی اتے آندے ہک ہفتے اچ ایں بارے ہنگامی پلان ٻݨاوے۔ وفاقی وزیر مواصلات آکھیا جو سفر کوں ٻیا محفوظ ٻݨایا ونڄے اتے پٹرولنگ توں محروم علاقیاں اچ موٹروے پولیس فوری پٹرولنگ شروع کرے۔ اجلاس اچ حیدر آباد، سکھر موٹروے دی تعمیر تے مختلف آپشنز بارے غور کیتا ڳئیا۔ وفاقی سیکرٹری مواصلات اتے چیئرمین این ایچ اے اجلاس کوں مختلف محکمانہ معاملیاں تے بریفنگ ݙتی۔
