کوئٹہ۔19دسمبر (اے پی پی):نگران وزیراعظم انوار الحق کاکڑ آکھیے جو پاکستان وفاق دی حیثیت نال آپݨی ثقافتاں ، روایات اتے زباناں دے تنوع توں طاقت گھندے ، بلوچستان دا اصل سرمایہ ایندے لوک تے اتھاں دی تہذیب اے، ہزاراں سال دی تہذیب دا مسکن بلوچستان درخشاں روایات دا امین اے۔ اے ڳالھ انہاں منڳل کوں پاکستان ٹیلی ویژن دےہزارگی زبان دے افتتاحی پروگرام دی تقریب توں خطاب کریندے ہوئیں آکھی اے ۔ نگران وزیراعظم آکھیے جو ہزارگی زبان اچ پی ٹی وی نشریات شروع کرݨ تے دلوں خوشی محسوس کرینداں پیاں ۔ایں خطے اچ پشتو ، بلوچی ، ہزارگی اتے فارسی زباناں موجود ہن ۔ بلوچستان اچ ٻولی ونڄݨ ھک ٻئی زبان کوں قومی سطح تے اجاگر کیتا ویندا پئے ، بلوچستان اچ میڈیا صنعت کوں ودھارا ݙیوݨ ساݙی ترجیح اے۔ ہزارہ برادری دے نال ساݙی قربتاں پراݨیاں ہن ۔ بلوچستان تے کوئٹہ اچ ہزارہ برادری دی ھک سنڄاݨ اے ۔ انہاں آکھیے جو ہزارہ برادری اچ ھک وݙی تعداد دہشت گردی دا شکار تھیوݨ آلے شہیداں دی ا ۔ دہشت گرداں بلوچستان دے ہر طبقے کوں نشانہ بݨائے ۔ دہشت گردی دا مقابلہ اساں ساریں رل تے کرݨا اے۔ بلوچستان دا اصل سرمایہ اتھاں دے لوک تے تہذیب اے ۔ بلوچستان اچ رہݨ آلیاں ساریاں برادریاں کوں ھکو سویں حقوق ملدن ۔ انہاں آکھیے جو پاکستان ثقافتی شناختاں دا امتزاج اے جیڑھا جو ھک ݙوجھے کوں تکڑا کریندن ۔ ٻئے صوبیں وانڳوں بلوچستان وی نسلاں اتے قبائل دا ھک بھرپورامتزاج اے جتھاں انہاں دیاں ثقافتاں تے اقدار بلوچ روایات نال جڑیاں پئن ۔ انہاں بلوچستان دی ہزارہ برادری دی تعریف کریندے ہوئیں آکھیے کوئٹہ اتے صوبے دی ترقی اچ انہاں دا اہم کردار اے ۔ ہزارہ برادری دی نمایاں شخصیات اچ سابق گورنر بلوچستان جنرل (ر) محمد موسیٰ، سردار سادات اتے بریگیڈیئر خادم حسین شامل ہن جنہاں آپݨی دیانتداری نال عزت بݨائی دہشت گردی دے چیلنج دا مقابلہ کرݨ تے ہزارہ برادری کوں خراج تحسین پیش کیتا تے آکھیے جو دہشت گردی توں ملک دے سارے طبقے متاثر تھئن ۔ ایں موقع تے نگران وزیراعظم انوارالحق کاکڑ پی ٹی وی بولان دے نویں لوگو دا افتتاح وی کیتا۔ ایں موقع تے نگران وزیر اطلاعات مرتضیٰ سولنگی وی خطاب کیتا ۔ ہزارگی دے شاعر قادر نیل ہزارگی زبان دے پروگرام دے تاریخی آغاز تےوزیر اعظم انوار الحق کاکڑ اتے وزیر اطلاعات مرتضیٰ سولنگی کوں خراج تحسین پیش کیتا تے آکھیے جو اوں علاقائی زبان دے پروگراماں دے گلدستے اچ ھک سوہݨا ودھارا کیتے ۔ گلوکارہ زیبا نوری ہزارگی لوک ڳاوݨ ڳا تے روایتی بلوچی لباس اچ ملبوس ٻالاں ہزارگی گاوݨ دیاں دھناں تے رقص پیش کیتا ۔
.jpg)
