اسلام آباد – 26 آگسٽ (اي پي پي) صدر ڊاڪٽر عارف علوي نئين نسل کي منشيات جي لعنت کان محفوظ رکڻ لاءِ اعليٰ تعليمي ادارن کي منشيات ۽ تماڪ کان پاڪ رکڻ جي ضرورت تي زور ڏيندي چيو آهي ته معذور ماڻهن کي يونيورسٽين ۾ مفت تعليم ڏني وڃي. اهڙن خيالن جو اظهار هن منشيات جي خاتمي ۽ خصوصي ماڻهن جي ڀلائي لاءِ وائيس چانسلرز ڪميٽي جي اجلاس کي خطاب ڪندي ڪيو. بريفنگ دوران ٻڌايو ويو ته منشيات ۽ تماڪ جي غلط استعمال جي پاليسي کي صدر جي هدايتن جي روشني ۾ حتمي شڪل ڏني وڃي، ايڇ اي سي 28 جولاءِ 2021ع تي پاليسي جي منظوري ڏني، منشيات جي خاتمي واري وزارت منشيات جي استعمال کي روڪڻ، علاج جي حوالي سان معلومات فراهم ڪرڻ لاءِ موبائيل ايپ زندگي تيار ڪئي آهي، خصوصي شاگردن کي تعليمي، ٽيڪنيڪي ادارن ۽ يونيورسٽين ۾ داخلا وٺڻ لاءِ 10 سالن تائين جي عمر ۾ نرمي فراهم ڪئي ويندي، بريفنگ ۾ ٻڌايو ويو ته خصوصي شاگردن کي اعليٰ تعليم لاءِ ٽيوشن فيس، هاسٽل فيس ۽ يوٽيلٽي بل تي ڇوٽ ڏني ويندي، صدر ڊاڪٽر عارف علوي چيو ته ملڪ جي اعليٰ تعليمي ادارن کي منشيات ۽ تماڪ جي استعمال کان پاڪ بڻائڻ جي ضرورت آهي، يونيورسٽين جي انتظاميه ۽ لاڳاپيل ادارا منشيات کي روڪڻ تي ڌيان ڏين ته جيئن نوجوانن کي تعليم لاءِ روزگار فراهم ڪري سگهجي، تعليمي ادارا قوم جي تقدير جي جوڙجڪ ۾ مرڪزي ڪردار ادا ڪندا آهن، هن چيو ته شاگردن کي منشيات کان پاڪ ماحول فراهم ڪرڻ اڻٽر آهي، هن چيو ته منشيات جي خاتمي ۽ تماڪ پاليسي ۽ خصوصي شاگردن جي ڀلائي وارين پاليسين کي جلد کان جلد لاڳو ڪرڻ جي ضرورت آهي، هن منشيات کي روڪڻ بابت وئيس چانسلرز ڪميٽي ۽ ٻين لاڳاپيل ڌرين پاران جوڙيل پاليسين کي به ساراهيو ۽ اميد ظاهر ڪئي ته ان سان تعليمي ادارن ۾ منشيات کي روڪڻ ۾ مدد ملندي.
