اسلام آباد۔14فروری (اے پی پی):وزیراعظم عمران خان آکھیے جو چوہدری برادران تے پورا اعتماد اے، اساں گھبراوݨ آلے کائنی ، گھبرائے او دھن جنہاں کوں ہݨ چوہدری شجاعت حسین دی صحت داخیال آڳئے ، 10 سال اچ نویں ڈیماں دی تعمیر توں پاݨی ذخیرہ کرݨ دی گنجائش ݙوگنا تھی ویسی ،کالاباغ ڈیم دی تعمیر توں پہلے سندھ دےعوام کوں مطمئن کرݨا پوسی ، ودھدی آبادی کیتے مزید زمیناں کوں قابل کاشت بݨاوݨ ناگزیر اے،طویل المدتی منصوبہ بندی نہ ہوݨ پاروں مسئلے پیدا تھئن ، درآمدی ایندھن توں بجلی دی پیداوار مہنانگ دا سبب اے ، اساں آئندہ انتخابات دی بجائے مستقبل دی منصوبہ بندی کریندے پیوں ، ڈیماں دی تعمیر دے ںال نال سیاحت دی ترقی کیتے ٹنل ٹیکنالوجی کوں وی ودھارا ݙیوݨا ہوسی ، اے ڳالھ انہاں سنوار کوں پاکستان اچ ہائیڈرو پاور ڈویلپمنٹ دے حوالے نال منعقدہ بین الاقوامی سمپوزیم توں خطاب کریندے ہوئیں آکھی اے وزیراعظم آکھیے جو پاکستان اچ 1960 دے ݙھاکے اچ 2 وݙے ڈیماں دی تعمیر دے بعد ملک اچ کوئی ڈیم نی بݨایا ڳیا ۔ چین 5 ہزار وݙے ڈیم بݨا چکے ۔ اساݙے ملک کوں ایں کوتاہی دی وجہ توں ٻہوں ضیان تھئے، انہاں آکھیے جݙاں درآمدی ایندھن توں بجلی پیدا کیتی ویسی تاں ایندی قیمت ودھ ہوسی کیوں جو دنیا اچ قیمت ودھݨ توں پاکستان اچ وی بجلی دی قیمت ودھ ویندی اے تے عوام تے ٻوجھ ودھ ویندے ۔ پاکستان اچ پن بجلی دی ٻہوں پیداواری صلاحیت اے۔ جݙاں بجلی مہانگی تھیندی اے تاں ساریں توں مہانگیاں چیزاں تھی ویندن ۔ اینویں جݙاں تیل مہانگا تھیندے تاں ٹرانسپورٹ اتے ݙوجھیاں چیزاں وی مہانگیاں تھی ویندن ، جے ڈیم بݨِائے ہوندے تاں بجلی مہانگی نہ تھیندی۔ تیل مہانگا تھیوݨ توں بجلی وی مہانگی تھیندی اے کیوں جو ادھی بجلی تیل توں پیدا کریندوں ۔ انہاں آکھیے جو بدقسمتی نال لمبی مدت منصوبہ بندی نہ ہووݨ دی وجہ توں مسئلے پیدا تھئے ، انہاں آکھیے جو چین دی تکھے ترقی دے راز لمبی مت منصوبہ بندی اچ ہے۔ او الیکشن دا نی سوچیندے ۔ میکوں فخر اے جو موجودہ حکومت آندے الیکشن دا سوچݨ دی بجائے اڳوں دی منصوبہ بندی کیتی اے ایں وجہ توں اساں اڄ ڈیماں دا عشرہ منیندے پیوں ۔اساکوں پاݨی ذخیرہ کرݨ دی لوڑھ اے ۔ صوبیں اچ پاݨی دی ونڈ دے حوالے نال ہݨ وی مسئلے ہن ۔جیویں تکھے اساݙی آبادی ودھدی پئی اے ، اساکوں ٻیا زیادہ زمین کاشت کرݨی ہوسی ۔ جݙاں پاݨی ذخیرہ نہ تھیسی تاں زمین کیویں کاشت تھیسی ۔ ڈیرہ اسماعیل خان اچ ذرخیز زمین اے لیکن پاݨی دی لوڑھ اے جے اینکوں پاݨی مل ونڄے تاں خیبر پختونخوا کوں کہیں ݙوجھے صوبے توں کݨک تے اناج منگواوݨا ہی نہ پووے ، اینویں بلوچستان اتے تھر اچ وی لکھاں ایکڑ رقبہ بنجر پئے، جیں کوں آباد کر تے اساں کݨک تے کپاہ برآمد کرسڳدوں ، وزیراعظم آکھیے جو 10 سال اچ نویں ڈیماں دی تعمیر توں پاݨی ذخیرہ کرݨ دی گنجائش ݙوگنا تھی ویسی ،دنیا کوں موسمیاتی تبدیلی دے وݙے مسئلے دا سامݨا اے ۔ جݙاں پاݨی توں ماحول دوست بجلی پیدا تھیسی تاں موسمیاتی تبدیلی دےمنفی اثرات وی گھٹ تھی ویندن ۔انہاں آکھیے جو ملک اچ آپݨے نوجوان انجینئرز کوں تربیت ݙتی ویندی پئی اے جنہاں کوں ڈیم بݨاوݨ اچ مہارت حاصل تھی ویسی ۔ اللہ تعالیٰ پاکستان کوں قدرتی مناظر توں مالا مال کر رکھیے ۔ ساݙے پہاڑسوہݨے تے دنیا اچ کوئی ملک انہاں دا مقابلہ نی کرسڳدا ایں توں سیاحت دے ذریعے اساں ٻہوں وݙی آمدنی حاصل کر سڳدوں۔ سوئٹزر لینڈ دی سوہݨپ ساݙے شمالی علاقیں توں ادھی اے لیکن ایندی سیاحت توں آمدنی 60 توں 70 ارب ڈالر اے۔ سویٹزر لینڈ ٹنل ٹیکنالوجی کوں ودھارا ݙتے تے پہاڑاں اچ انہاں ٹنلز بِا تے اتھاں رسائی ودھا ݙتی ۔ وزیراعظم آکھیے جو وفاقی وزیر آبی وسائل مونس الہٰی کالا باغ ڈیم دی ڳال کیتی اے ایندے اچ کوئی شک کائنی جو اساکوں پاݨی ذخیرہ کرݨ دی لوڑھ اے تے کالا باغ ڈیم بہترین جاہ تے ہے او میݙے حلقے اچ وی ہے لیکن صرف ھک مسئلہ اے جو اساکوں سندھ دے بھراویں کوں قائل کرݨا پوسی ۔
