کراچی۔14ستمبر (اے پی پی):پاک فضائیہ آکھیے جو سیلاب توں متاثرہ لوکاں دے مسئلیں دا چنڳی طرح پتہ اے ،انہاں دی بہبود تے بحالی کیتے ہر ممکن کوشش کریندے پیوں ۔ جاری اعلامیے موجب پاک فضائیہ بلوچستان، سندھ، خیبرپختونخوا اتے جنوبی پنجاب دے سیلاب آلے علاقیں اچ بھرپور طریقے نال امدادی کارروائیاں اتے ریسکیو دے عمل اچ سول انتظامیہ دی مدد کرتے ریاستی اداریں کوں مزید فعال کریندی پئی اے ۔ فضائیہ فیلڈ میڈیکل کیمپس وی بݨائن جتھاں ڈاکٹرز اتے پیرا میڈیکل سٹاف چووی گھنٹے سیلاب متاثرین کوں طبی سہولتاں تے مفت دوائیاں ݙیندا پئے ، اعلامیہ اچ آکھیا ڳئے جو امدادی کارروائیاں دے دوران پاک فضائیہ دی ایمرجنسی ریسپانس ٹیماں تیار کھاݨا، خشک راشن تے ٻیاں ضروری چیزاں ݙتن ، گزریل چووی گھنٹے اچ اٹھال، لاکھڑا، مٹیاری، شہداد کوٹ، صحبت پور، قلعہ عبداللہ، فاضل پور، جھل مگسی، حاجی پور، وستی شیر محمد اتے وستی جاگیر گبول دے ضرورت مند خانداناں اچ 15 ہزار 719 پکے ہوئے کھاݨے دے پیکٹ، 507 پاݨی دیاں بوتلاں تے 3ہزار 415 خشک راشن دے پیکٹ ݙتن ۔ پاک فضائیہ دی ایمرجنسی رسپانس ٹیماں سیلاب اچ پتھے لوکاں دے بحفاظت انخلا اچ مسلسل مصروف ہن، پاک فضائیہ دیاں میڈیکل ٹیماں 2 ہزار 416 مریضاں دا طبی معائنہ وی کیتے۔پاک فضائیہ آکھیے او قدرتی آفات دے دوران انسانی بنیاداں تے امداد ݙیوݨ اچ ہمیشہ پیش پیش رہی اے، اڄوکیاں امدادی کارروائیاں ضرورت دے ایں ویلھے اچ اساں وطنوں دی مدد کیتے پاک فضائیہ دے عزم دا عملی نمونہ ہن۔
