اسلام آباد۔19جون(اے پی پی)وزیراعظم محمد شہباز شریف آکھیے جو ساکوں قرض توں جان چھڑاوݨی ہوسی، چین سودھا ہر سنڳتی ملک ہر اوکھے سوکھے ویلھے نال تھئے، اپݨے قدرتی وسائل توں فیدہ چاوݨ کیتے خود کفیل ٻݨ سڳدے ہیں، ایندے کیتے عملی طور تے ملکی ترقی دے اقدامات کرݨے ہوسن، اتحادیاں نال رل مل تے ترقی دا پندھ جاری رکھسوں۔ اے ڳالھ انہاں وزیراعظم نیشنل انوویشن ایوارڈ دی تقریب نال خطاب اچ آکھی۔ انہاں آکھیا جو ساݙے تعلیم یافتی، پڑھے لکھے اتے ہنر مند نینگر ساݙا ماݨ ہین، جیڑھے مختلف شعبیاں اچ ودھ مہارت اتے جذبہ ݙکھیندے پن، خوشی اے جو ملک دا مستقبل انہاں ہونہار ہتھاں اچ محفوظ اے، ساکوں اپݨے نینگراں تے سرمایہ کاری کرݨی ہوسی، حکومت اپݨے نیگراں کوں پیرین تے کھڑا کرݨ کیتے ہر سوکھ ݙیسی، ہونہار طلبہ کوں لیپ ٹاپ ݙتے ویسن۔ انہاں آکھیا جو پاکستان کوں وݙے معاشی چیلنجز ہین، جیکر پوری قوم ارادہ ٻدھ ڳھنے تاں ہر اوکھ پار کر ویسوں اتے ملک تیکھے خوشحال تھی ویسی، ملک تے قرض دا ٻھار اے جیندے توں جان چھڑاوݨی ہوسی، ایں سانڳے اپݨے قدرتی و انسانی وسائل، اپݨیاں صلاحیتاں توں فیدہ چاوݨا ہوسی، او ویلھا آ ڳئے جو ملک دی تقدیر وٹا ݙیووں، ساکوں معیشت دے ایجنڈے تے ہک مٹھ تھیوݨا ہوسی، قومی ایجنڈے کیتے کم کرݨا ہوسی، خارجہ اتے معاشی پالیسی تے ہکو ایجنڈہ ڳھن آسوں، تیکھے پاکستان دا ناں نہ صرف عالم اسلام ٻھل اقوام عالم اچ اچا تھیسی۔
