اسلام آباد۔12اکتوبر(اے پی پی)نگران وزیراعظم انوارالحق کاکڑ سابق وزیراعظم نوازشریف دی وطن واپسی اچ ڈیل دے تاثر کوں مسترد کریندے ہوئیں آکھیے جو نگران حکومت کہیں ڈیل دا حصہ کیوں ہوسی، نواز شریف عدالتی فیصلے دے تحت ملک توں ٻہر ڳئے تے انہاں کوں وطن واپسی تے کجھ قانونی سوالاں دا سامناکرݨا ہوسی ، نگران حکومت مسلم لیگ(ن) کیتے کوئی نرم گوشہ نی رکھیندی ۔اے ڳالھ انہاں ڈیجیٹل پلیٹ فارم’’ وی نیوز‘‘ کوں ݙتے ڳئے انٹرویو اچ آکھی اے ۔جݙاں وزیراعظم توں سوال کیتا ڳئے جو نواز شریف کہیں ڈیل نال واپس آندے پئن ؟ تاں وزیر اعظم جواب ݙتے ھک نگران حکومت ایہو جی کہیں ڈیل دا کیا حصہ ہو سی اتے کیوں ہوسی۔نواز شریف جݙاں ھک عدالتی فیصلے دے تحت ملک توں ٻہر ڳئے تاں او ویلھے عمران خان دی حکومت ہئی، اوں ویلھے نہ تاں اے نگران سیٹ اپ اتے نہ ہی پی ڈی ایم جماعتاں دی حکومت ہئی۔ انہاں آکھیے نواز شریف کوں وطن واپسی تے کجھ قانونی سوالاں دا سامݨا کرݨا ہوسی تے انہاں سوالاں دے جواب وی قانونی ہن ۔انوارالحق کاکڑمسلم لیگ نواز کیتے نرم گوشہ رکھݨ دے تاثر کوں مسترد کرݙتے۔ انہاں آکھیے نگراں وزیر اعظم بݨݨ توں پہلے میݙی مریم نواز ، بلاول بھٹو، مولانا فضل الرحمان، آصف زرداری اتے 9 مئی دےواقعات توں پہلے عمران خان نال وی ملاقاتاں تھیاں ۔ انہاں آکھیے میں کوئی بیوروکریٹ کائنی بلکہ ھک رکن پارلیمنٹ ہم تے اتھوں مستعفی تھی تے میں اے منصب سنبھالیے اتے کیڑھی سیاسی جماعت یا کیڑھے لوک ہوسن جیڑھے میں نال ملاقاتاں نہ کریندے ہوسن لہٰذا کہیں ھک ملاقات کوں ھک جماعت نال جوڑ ݙیوݨ انصاف تے مبنی کائنی ۔ھک سوال دے جواب اچ انہاں آکھیے پاکستان ھک ترقی پذیر جمہوریت اے جتھاں آئینی انصرام موجود اے اتے اتھاں عدالتی طریقہ کار دی ھک اپݨی اہمیت اے۔ انہاں آکھیے عمران خان سودھے کہیں وی سیاسی شخصیت بارے جیڑھا وی کوئی فیصلہ تھیسی او عدالتی عمل دے نتیجے اچ ہوسی ۔جے عدالتی عمل دے نتیجے اچ عمران خان کوں انتخابات اچ حصہ گھنݨ دی اجازت ملدی اے تاں او حصہ گھنسن جے نی تاں میں کیویں ایں پابندی کوں ختم کرسڳداں ۔نگران وزیراعظم انوارالحق کاکڑ آکھیے انہاں دی الیکشن کمیشن آف پاکستان نال جتنیاں ملاقاتاں تھئن انہاں موجب انتخابات دیاں تیاریاں مکمل ہن تے انتخابات اپݨے مقررہ وقت تے ہی تھیسن لیکن انتخابات اچ سکیورٹی دے حوالے نال خدشات مکاوݨ سانڳے اقدامات جاری ہن ۔ الیکشن کمیشن جنوری اچ انتخابات دے حوالے نال اپݨے انتظامات کافی حد تئیں مکمل کرڳھدن۔
