اسلام آباد۔20اگست(اے پی پی)وفاقی کابینہ کوں ݙسایا ڳئے جو وزیراعظم محمد شہباز شریف دی ہدایت تے مبارک ثانی مقدمہ بارے حکومت سپریم کورٹ اچ اضافی درخواست دائر کر ݙتی اے، اٹارنی جنرل 22 اگست 2024 کوں سپریم کورٹ اچ ایں درخواست دی سماعت اچ دلائل ݙیسن، کابینہ وزارت تجارت اتے ازبکستان دی وزارت سرمایہ کاری وچال ای کامرس دے شعبے اچ تعاون دی مفاہمتی یادداشت تے دستخط کیتے ڳن، “پرائم منسٹرز سکلز ڈویلپمنٹ کمپنی” سانڳے کنگ حماد یونیورسٹی آف نرسنگ اینڈ ایسوسی ایٹڈ میڈیکل سائنسز دے آپریشنز نیشنل یونیورسٹی آف میڈیکل سائنسز کوں ݙیوݨ دی وی منظوری ݙتی اے۔ وزیراعظم محمد شہباز شریف دی اڳواݨی اچ اسلام آباد اچ تھیوݨ آلے وفاقی کابینہ دے اجلاس اچ مبارک ثانی مقدمہ بارے سپریم کورٹ دے اڄوکے فیصلے تے بریفنگ ݙتی گئی۔ کابینہ کوں ݙسیا ڳئیا جو وزیراعظم دی ہدایت تے مبارک ثانی مقدمہ دے حوالے نال سپریم کورٹ آف پاکستان اچ 17 اگست 2024 کوں ہک ودھیکی درخواست دائرکر ݙتی ڳئی اے۔ کابینہ کوں ٻیا ݙسیا ڳئیا جو ایں مقدمے بارے قومی اسمبلی اچ تفصیلی بحث تھئی اے اتے اے معاملہ قومی اسمبلی دی قائمہ کمیٹی برائے قانون و انصاف دے حوالے کر ݙتا ڳئے۔ قومی اسمبلی دی قائمہ کمیٹی برائے قانون و انصاف دے اجلاس اچ حکومت اتے اپوزیشن جماعتاں متفقہ طور فیصلہ کیتے جو قومی اسمبلی وفاقی حکومت کوں اے آکھسی جو ایں مقدمے دے واقعاتی اتے قانونی پہلواں اتے علمائے کرام دی رائے بارے سپریم کورٹ اچ حکومت ولوں درخواست دائر کیتی ونڄے۔ ایں بارے وزیراعظم سپیکر قومی اسمبلی وچال ٹیلی فونک رابطہ تھیے جئیں دے بعد وزیراعظم دی ہدایت تے حکومت ولوں سپریم کورٹ اچ ودھیکی درخواست دائر کر ݙتی ڳئی اے۔ وزیر اعظم دی ہدایت دے مطابق اٹارنی جنرل 22 اگست 2024 کوں سپریم کورٹ اچ ودھیکی درخواست دی سݨیڄ اچ پیش تھیسن اتے آپݨی ٹیم دے رلے علمائے کرام اتے قومی اسمبلی دی قائمہ کمیٹی برائے قانون و انصاف دی رائے دی روشنی اچ دلائل ݙیسن۔ وزیراعظم ایں بارے واضح ہدایت جاری کر ݙتن۔ وفاقی کابنہ وزارت تجارت دی سفارش تے ازبکستان دی وزارت سرمایہ کاری ، صنعت و تجارت اتے پاکستان دی وزارت تجارت وچال ای کامرس دے شعبے اچ تعاون ودھاوݨ دی مفاہمتی یادداشت تے دستخط دی منظوری ݙے ݙتی اے۔ وفاقی کابینہ وزارت وفاقی تعلیم و پیشہ ورانہ تربیت دی سفارش تے کمپنیز ایکٹ 2017 دے سیکشن 42 دی روشنی اچ قومی کمیشن برائے تکنیکی و پیشہ ورانہ تربیت دے تحت “پرائم منسٹرز سکلز ڈویلپمنٹ کمپنی” ٻݨاوݨ دی منظوری ݙے ݙتی اے۔ ایں کمپنی دا قیام تکنیکی تے پیشہ وارانہ تربیت کیتے فنڈز کٹھا کرݨ، فنڈ مینجمنٹ اتے ایں فنڈ دے تحت مختلف تربیتی پروگراماں دا نفاذ اے۔ وزیر اعظم دی ہدایت تے قومی کمیشن برائے تکنیکی و پیشہ ورانہ تربیت دے آپریشنل اتےریگولیٹری معاملیاں کوں انڄ کرݨ بارے ایں کمپنی ٻݨائی ویندی پئی اے جئیں دے بعد پرائم منسٹرز سکل ڈویلپمنٹ کمپنی تکنیکی تے پیشہ وارانہ تربیت دے آپریشنل معاملے ݙیکھسی جڈانجو قومی کمیشن برائے تکنیکی و پیشہ ورانہ تربیت ریگولیٹری امور ݙیکھسی۔ کابینہ وزارت قومی صحت دی سفارش تے کنگ حماد یونیورسٹی آف نرسنگ اینڈ ایسوسی ایٹڈ میڈیکل سائنسز دے آپریشنز نیشنل یونیورسٹی آف میڈیکل سائنسز کوں ݙیوݨ دی منظوری ݙے ݙتی، ایں سانڳے وزارت قومی صحت اتے وزارت دفاع وچال مفاہمتی یادداشت تے دستخط کیتے ویسن۔ وفاقی کابینہ، کابینہ کمیٹی برائے حکومتی ملکیتی اداریاں دے 12 اگست 2024 دے اجلاس اچ کیتے گئے فیصلیاں دی توثیق کرݙتی۔ وفاقی کابینہ اقتصادی رابطہ کمیٹی دے 15 اگست 2024 کوں تھیوݨ آلے اجلاس اچ کیتے گئے فیصلاں دی توثیق کرݙتی۔
